Шанбегии дастаҷамъонаи кормандони «Амонатбонк»
Покиву зебоипарастӣ, ободкориву бунёдкорӣ хоси миллати тамаддунофар ва қадимаи тоҷик дониста шуда, ҷиҳати саҳмгузорӣ дар корҳои ободонию тозакорӣ ва сабзгардонии кучаҳои шаҳрамон ва гирду атрофи коргоҳ бо иштироки кормандони Раёсати “Амонатбонк” ва филиалҳои он рӯзи шанбегӣ доир гардид.
Дар шанбегӣ аҳли кормандони Бонк баҳри ободонии гушае аз пойтахти кишвар дастаҷамъона иштирок намуда, дар тозаю озода кардани гирду атрофи коргоҳи хеш ва гузаргоҳ, нарм намудани бехи дарахтони сояафкан ва гулу буттаҳои ороишии қаблан шинонидашуда саҳми бевоситаи худро гузоштанд.
Лозим ба зикр аст, кормандони Бонк дар баробари анҷом додани рисолати касбӣ ва иштироки фаъолона дар чорабиниҳои фарҳангию варзишӣ, дар корҳои ободонию ҷамъиятӣ низ саҳмгузор мебошанд.
Аз ин рӯ тасмим гирифта шудааст, ки дар тамоми филиал ва марказҳои хизматрасонии бонкӣ корҳои ободонӣ мунтазам анҷом дода шавад.
Боиси зикр аст, ки ҳамасола барои ободу зебо ва сарсабзу хуррам гардонидани кӯчаю хиёбонҳои шаҳру ноҳияҳои кишвар қарорҳои дахлдор ва нақшаи чорабиниҳо оид ба шинонидани ниҳолҳои дарахтону буттаҳо ва гулҳои мавсимию бисёрсола таҳия гардида, маъракаҳои ниҳолшинонӣ доир карда мешаванд.
Вобаста ба ин давоми соли 2025 аз ҷониби Бонк дар резервати биосферии Ромит воқеъ дар шаҳри Ваҳдат 40 000 дарахтони сояафкан, сузанбарг ва мевадиҳанда шинонида шуда, ҷараёни нашъунамои онҳо таҳти нигоҳубин қарор дорад.
